Løyve til tiltak etter hamne- og farvasslova

Skal du gjennomføre eit tiltak som kan påverke tryggleik, ferdsel eller forsvars- og beredskapsinteresser i sjøen? Då må du søkje om løyve.

Dette kan du søkje om:

Innretningar (t.d. bru, brygge/flytebrygge, energianlegg i sjø, kablar/røyr/leidningar, kai/molo/bølgedempar, luftspenn, merdanlegg, petroleumsinnretningar)
Naturinngrep (t.d. dumping av massar, omlasting frå skip til skip, sprenging, utdjuping/mudring)
Aktivitetar (t.d. større slep, båtrace/regatta, omlasting frå skip til skip, opplag, seismiske undersøkingar, utprøving av utstyr)

Skal du søkje hos Kystverket eller kommunen?

Du kan søkje hos Kystverket dersom minst eitt av kriteria gjeld:

Tiltaket skal liggje heilt eller delvis i farlei
Tiltaket ligg utanfor farlei, men kan påverke tryggleik eller ferdsel i hovudlei eller bilei
Tiltaket er omfatta av hamne- og farvasslova § 14 tredje ledd bokstav a - i, sjå meir om dette i rettleiinga frå Kystverket

Du kan sjekke kvar farlei går hos kystinfo.no ved å huke av kartlaget “Hovud- og bilei” under “Farled og merker”.

Dersom ingen av kriteria gjeld, må du søkje hos kommunen i staden.

Før du søkjer:

Dersom du tek på deg oppdraget med å søkje på vegner av [...] treng du fullmakt
Dersom byggegrunnen ikkje er trygg må du kunne gjere greie for kvifor tiltaket likevel bør kunne gjennomførast
Dersom tiltaket strir mot gjeldande kommuneplans arealdel eller reguleringsplan treng du dispensasjon

Sensitive opplysningar og unntatt offentlegheit

Opplysningar eller dokument som inneheld sensitiv informasjon eller som er unntatt offentlegheit skal IKKJE sendast inn via denne løysinga. Bruk då tenesta for sikker innsending eDialog. Lenke til eDialog er tilgjengeleg via «Kontakt Kystverket» på våre nettsider.

Behandling av personopplysningar

Vi ber om personopplysningar som namn, telefonnummer, e-postadresse og adresse. Dette er opplysningar vi treng for å utøve offentleg myndigheit. Vårt behandlingsgrunnlag følgjer av personvernforordninga artikkel 6 bokstav nr. 1 bokstav e, jf. nr. 3 bokstav b og føresegner gitt i og i medhald av hamne- og farvasslova, herunder § 14.